Mayor Jerry Treñas “gina-snub” na ni Foreign Secretary Teddyboy Locsin?
Ang siudad sang Iloilo magabalik sa mas halog nga General Community Quarantine (GCQ) sugod karon nga adlaw, Oktubre 1, 2020.
Sandig sa pahayag ni Presidente Rodrigo Duterte, ang Inter-Agency Task Force (IATF) COVID-19 nagpabor sa pangabay ni Mayor Treñas pagligad sang 6 ka adlaw nga ginpatuman diri ang Modified Enhanced Community Quarantine (MECQ).
Una gintalana nga magadugay sang 15 ka adlaw ang MECQ sa siudad, ukon tubtub Oktubre 9, 2020.
Paagi sa iya ‘Twitter comment’ ginpakala-in ni Teddyboy Locsin ang “pasapayan” nga pagpalakat ni Mayor Trenas sa pandemic.
Maabtik kag matigda ang sabat ni Treñas: si Locsin nagapakuno-kuno nga sia lang ang maalam kag mangu ang mga Ilonggo sa siudad.
Gintawag ni Treñas si Locsin putot nga kalbo. “Kon gusto ya tapungolay na lang kami,” hangkat ni Jerry kay Teddyboy sa interview sang Bombo Radyo Iloilo.
Kahapon ginpahayag ni Mayor Treñas sa interview sang RMN Iloilo nga “daw gina-snub” na sia ni Sec. Locsin pagkaligad sang pila ka adlaw nga wala ginsabat ang iya paghangkat.
Samtang, ginpanas na ang bala-ison nga mga komento sa Twitter ni Teddyboy Locsin kontra kay Jerry Treñas.
Lipod sa kadam-an, si Teddyboy Locsin isa ka Ilonggo apang nagdugay na sa Metro Manila. Ang iya katigulangan “taga-Silay nga halin sa Pari-an” (Molo), siudad sang Iloilo.
